CHIRO BUJUMBURA, akanyamuneza ni kenshi !

AKANYAMUNEZA MU MUHARI WA CHIRO MURI DIYOSEZE NKURU YA BUJUMBURA

Bavukanzi bakunzi b’Imahari n’Imirwi y’Ubutumwa muri Ekleziya,

            Ku musi w’Imana igenekerezo rya 14 ndamukiza, umuhari wa CHIRO muri diyoseze nkuru ya Bujumbura wari uramukanye umunsi mukuru udasanzwe, bahagatiye Umwungere wa Diyoseze nkuru ya Bujumbura, Nyenicubahiro Musenyeri Evariste NGOYAGOYE, Patiri MUGABONIHERA Ferdinand ajejwe ubutumwa bw’Imihari n’Imirwi y’ubutumwa muri diyoseze nkuru ya Bujumbura (Icegera muri CDAL), Patiri Martin NIBITANGA, Umwibutsamana w’Umuhari wa CHIRO muri diyoseze, aheruka kugenwa  n’Umwepiskopi  mukuru wa Bujumbura. Hari kandi na Kizigenza mukuru ahereka gutora i Gitega, umushingantahe NDAYISHIMIYE Telesphore.

Uwo musi mukuru w’akanyamuneza muri CHIRO warugizwe n’imanza zitatu:

1.     Abachiro bose bahimbariza hamwe umunsi mukuru w’umuvunyi wabo, umweranda patiri Yohani Bosko. Hari imvo yatumye bunguruza uwo munsi mukuru usanzwe uhimbazwa kuwa 31 nzero buri mwaka;

2.    Ukurungika icese amakote atandatu mashasha y’intarampuzabutumwa zigize umuhari wa CHIRO muri diyoseze (Mutumba, Buhonga, Bujumbura, Rushubi, Kiganda na Bukeye) hamwe n’ugushikiriza ubutumwa komite y’uwo muhari ku rwego rwa Diyoseze;

3.    Gushikiriza umwibutsamana wa CHIRO muri diyoseze nkuru ya Bujumbura.

            Umunsi mukuru wa Yohani Bosko Mweranda, umuvunyi wa CHIRO, uyu mwaka washitse usanga ata ndongozi uyo muhari ufise ku rwego rwa diyoseze n’intarampuzabutumwa. Egome nivyo amatora yaba kizigenza n’intwaza yari yamaze kuba (kuwa 27 nzero 2013) ariko ntibari bwemezwe canke ngo bahabwe ubutumwa n’Umwungere wa Diyoseze. Nico catumye uwo munsi mukuru uhimbarizwa mu maparuwase honyene. Kari rero akaryo ko kwigina umuvunyi wa CHIRO, abachiro bose bari hamwe n’Umungere wa Diyoseze. Kaba n’akaryo ko kubibutsa ingeso nziza zaranze uwo Mweranda ngo zimurikire abachiro bose twipfuzako bokwama bamwambaza mu kuri, cane cane ko yari umurenzi nyawe w’urwaruka abicishije mu gusenga, gukora no gukina nkuko icivugo ca CHIRO kibiserura.

            Vyahuriranye nuko haheruka gutorwa amakomite mashasha ya CHIRO muri diyoseze yose kuva kubisata gushika ku rwego rwa diyoseze.

Iyo ngigo yo kuringaniza amatora yafashwe n’Umwepiskopi mukuru wa Bujumbura aho aboneneye ko hari akagwi k’abantu badahanurwa bigungana ubutegetsi, bashaka kwiba umuhari,  bakongera bagakoresha nabi amatungo y’Umuhari wa CHIRO; muri make, vyose bari bavyigaruriyeko kubera ugukunda amaronko. Agatima kabi ko kwanka Ekleziya n’abakuru bayo karabatera mbera karabizizira, ntibaba bagisonera canke ngo bagamburukire uwo Kristu yaragije ubusho bwiwe muri diyoseze, umwepiskopi wacu. Bagashaka mbere no kwandukiza iyo ndengo abandi bachiro, babanje kubanyegeza ukuri.

Mu bisanzwe bari baronse impanuro nyinshi zitanzwe na benshi kandi incuro nyinshi cane. Ariko izo mpanuro zose ziba impfa gusa!!! Aho rero umwungere aboneye ako kagwi k’abachiro gahemutse, kakabishira ahabona,  kakaja mu Bushikiranganji bw’Intwaro ya hagati mu gihugu guhinduza Amategeko ya CHIRO (Statuts) ngo bafutisha Umuhari wa CHIRO muri paruwase, muri Diyoseze no muri Ekleziya baheze bawimurire muri Komine, muri Provensi no mu gihugu gusa, Umwepiskoip mukuru wa Bujumbura yararengewe ati: “CHIRO ni umuhari w’Ekleziya watanguye muri 1953. Ntibikunda ko hari umuntu n’umwe awutwiba canke ngo awiyitirire”.

Niko rero gufata ingingo nziza zose kandi zibereye zuzuye ubwitonzi n’ubuvyeyi ngo CHIRO inaguke canke isubire itoto n’isura nshasha. Mbere turamukengurukiye cane!

Aca ashinga ikirangamisi c’amatora muri diyoseze yose:

·         Kuwa 20.01 : amatora ku bisata n’amaparuwase yose arimwo umuhari wa CHIRO. Yari ahagarikiwe n’abasaserdoti bashinzwe ubutumwa b’imihari n’imirwi mu maparuwase

·         Kuwa 27.01 : amatora mu ntarampuzabutumwa zose no gutora Komite ya diyoseze. Hari mu nyubakwa za Cercle saint Michel i Bujumbura

Kuwa 14 ruhuhuma umwepiskopi agena umwibutsamana w’umuhari wa CHIRO n’abandi bibutsamana indwi muri diyoseze.

Urubanza rwo kuri uyu w’Imana rero rwari rufise intumbero kwari ugusozera ico gikorwa n’ugusezerera ingorane n’ibihuhusi bihitiye mu muhari wa CHIRO, n’ukwerekana ko CHIRO ataco yabaye kandi ataho yagiye. N’abachiro baraho nabo nyene barerekanye ko twinjinye mu bihe bishasha. Ibikorwa vy’uyo munsi vyatangujwe n’urugendo rurerure kandi ruteye igomwe (défilé) murimwo abachiros barenga amajana atatu (300), bafise ingoma n’amafamafare, bashajije kandi banezerewe, baririmba bivuga CHIRO. Rwahereye kuri Cathedrale Regina mu ndi gushika aho Ikinyamakuru ndongozi gikorera.

Inyuma y’inkuka ya misa yaherejwe n’Umungere wacu, aho yasabiye cane abachiro ngo bagume bakorera Kristu Umwami wabo, ntibamuhebe nkuko bama babiragana, Umwepiskopi yarafashe umwanya ukwiye, araganira n’abachiro bose, arabahumuriza. Ati : « Twebwe nta nzigo dufise ; kirazira kugira inzigo. Na barya babaye ibigaba nibagaruka tuzobakiriza yompi. Ariko hari ivyo tuzobanza kubasaba : gusubiza ibikoresho n’ubutunzi bw’umuhari ». Nabo baramwigina mu dukino twinshi twiza, kandi baramwemererako ubu bagiye gukorera Ekleziya n’urukundo rwinshi, barongerako ko bazokwerekana n’aho ibikoresho vya CHIRO biri, nkako barahazi. Nawe aremera kubashigikira mu bishoboka vyose.

Yarabashikirije n’Umwibutsamana wabo, patiri Martin NIBITANGA asanzwe arangurira ubutumwa muri paruwae GATUMBA. We yivugiye ati : « Jewe ubutumwa nahawe n’umwepiskopi narabwemeye kandi ndabugamburuka. Namwe bachiro, igihe cose muzoba munkeneye : jewe niho ndi »

Patiri Ferdinand MUGABONIHERA ajejwe ubutumwa bw’imihari n’imirwi muri diyoseze nawe yarakengurutse bivuye kumutima utwigoro komite ya diyoseze nshasha imaze kugira. Mu mwanya muto bamaze batowe, bamaze gukiza vyinshi cane. Bamaze kugira n’ingendo mu maparuwase aho CHIRO yari yarasinzikaye ngo batange umuco ; turabonako bahinda Kristu, barahanurwa kandi bagamburukira Ekleziya. Bihore gurtyo. Amajambo yose yashikiriza yari meza cane kandi yasubije umwizero abaraho bose.

Ibirori vyasozerewe n’ukwivuna inzara n’inyota vyabereye aho nyene, tubifashijwemwo n’abachiro bo muri Bataillon PARA. Mu gusabikanya utwabonetse, vyaragaragarako abachiro bafise umutima umwe kandi ko bakunda umuhari wabo.

Imana ihezagire CHIRO muri iyo ngendo nshasha. CHIRO…NTAHEBA !

Patiri Ferdinand MUGABONIHERA.